Mandati i Pete Hegseth në krye të Pentagonit ka marrë përmasa dramatike “shakespeariane”, me ndihmës që i kthejnë shpinën, intriga të egra mes rivalëve, një bashkëshorte ambicioze dhe një “luftë civile” të brendshme që rrezikon të tronditë të ardhmen e ushtrisë amerikane.

Më tronditëse janë vetë figurat që luajnë në këtë dramë: njerëz nga ekipi i Hegseth – përfshirë miq të vjetër dhe aleatë – po e braktisin, duke rrëfyer për kaos, shpërthime emocionale dhe sjellje të papërshtatshme brenda Departamentit të Mbrojtjes.

Pas tij qëndron bashkëshortja e tij e tretë, Jennifer, mbështetësja më e zjarrtë dhe influenca më e fortë që e shtyn përpara.

Fundi i kësaj farse mbetet ende i paqartë: a do të mundet Hegseth të ruajë postin si Sekretar i Mbrojtjes, apo do të bëhet viktima e parë në kabinetin e presidentit Donald Trump?

Për momentin, Trump ka shprehur mbështetjen për Hegseth – por presidenti është i njohur për ndërrimin e shpeshtë të mendjes dhe ka pak durim për dramën që nuk është krijuar prej tij vetë.

Ndërkohë, Hegseth ka nisur një ofensivë të dëshpëruar për të shpëtuar postin. Ai doli në Fox News – rrjeti i preferuar i Trump – për një intervistë të zjarrtë, ku akuzoi ish-punonjës të pakënaqur se po përpiqen të sabotojnë agjendën e Trump.

Por titujt negativë nuk i janë ndarë, përfshirë një raport që tregon se ai ka shpenzuar mijëra dollarë të taksapaguesve për ta kthyer një dhomë në Pentagon në një studio personale grimi për paraqitjet në TV. CBS News raportoi se renovimet kushtuan disa mijëra dollarë, përfshirë instalimin e një pasqyre të madhe me ndriçim grimi dhe mobilje të reja.

Departamenti i Mbrojtjes reagoi kundër raportimit për “studion e grimit”, duke e quajtur “fake news”.

“Artikujt që iu shtuan DHOMËS JESHILE (jo një studio grimi) ishin nga inventari ekzistues. Ky artikull është PLEHRË!” shkroi llogaria zyrtare e reagimeve të shpejta të Departamentit në X (ish-Twitter).

Sipas CBS News, një ndër nxitëset për renovim ishte Jennifer Hegseth, ish-producente në Fox, e cila dha miratimin për përmirësimin para se të fillonte. Ajo gjithashtu ishte pjesë e një bisede në aplikacionin Signal ku i shoqi ndante detaje për operacione ushtarake sensitive.

Jennifer nuk punon në Pentagon dhe nuk ka asnjë autorizim sigurie. Por ajo është një këshilltare e besuar e bashkëshortit dhe ishte e pranishme vazhdimisht gjatë seancave të konfirmimit në Senat, kur emërimi i tij rrezikohej për shkak të akuzave për sjellje ndaj grave dhe probleme me alkoolin.

“Ajo ishte në çdo takim të tij me senatorët republikanë, gjë që nuk ndodh zakonisht me asnjë kandidat për post qeveritar,” tha një ndihmës i Senatit për CNN.

Sipas ndihmësit, senatorët femra ishin të frustruara me praninë e Jennifer sepse dëshironin ta pyesnin Hegseth për akuzat për sulm seksual. Por prania e saj “ndryshoi krejtësisht dinamikën” e bisedave, tha ai.

Jennifer ka marrë pjesë edhe në takime të ndjeshme në Pentagon, përfshirë një muaj më parë me dy zyrtarët më të lartë të mbrojtjes së Britanisë së Madhe mbi vendimin e administratës Trump për të ndaluar ndarjen e inteligjencës ushtarake me Ukrainën.

Megjithatë, ndërsa vëmendja ka rënë mbi bashkëshorten e tij, fajësimi po përqendrohet gjithnjë e më shumë te vetë sekretari i Mbrojtjes, pasi zyrtarët e përshkruajnë Pentagonin si në gjendje “shkrirjeje”.

“Ka një shpërbërje totale në ndërtesë, dhe kjo pasqyron drejtimin e sekretarit,” tha për Politico një person i njohur me situatën. “Pete Hegseth është rrethuar me njerëz që nuk kanë interesat e tij në zemër.”

Hegseth, ish-prezantues i Fox News, nuk kishte asnjë përvojë ekzekutive kur Trump e emëroi për të udhëhequr ushtrinë amerikane.

Përpjekja për t’u rrethuar me këshilltarë me përvojë dështoi shpejt, pasi rrethi i ngushtë u kthye në një përplasje të hidhur për pushtet dhe intriga të pastra.

Dhe shkaku kryesor i kësaj, sipas Politico, ishin “konfliktet e personalitetit”.

Miqtë që Hegseth solli për ta ndihmuar u kthyen në rivalë, duke luftuar për ndikim dhe duke krijuar një atmosferë mosbesimi.

Një ndër më të përfolurit është Joe Kasper, shefi i stafit në largim, i akuzuar për krijimin e një kulture pune toksike dhe për përjashtimin e tre zyrtarëve të lartë nga Pentagon. Sipas burimeve, këto shkarkime ishin përpjekje e Kasper për të konsoliduar pushtetin. Kasper i ka mohuar këto akuza.

Por zyrtarët përshkruan stilin e tij si “infantil” dhe treguan se në një mbledhje të nivelit të lartë ai “përshkroi në mënyrë grafike lëvizjet e zorrëve të tij”.

Në atë mbledhje, ai u kthye dhe tha: “A mund t’ju them të gjithëve se bëra një m** të madh para se të hyja këtu?”, sipas dy personave të pranishëm.

“Njerëzit u shokuan: ‘Çfarë? Kjo është një mbledhje zyrtare’,” tha një zyrtar.

Kasper i tha Politico se komenti ishte nxjerrë jashtë konteksti dhe se po bënte një shaka duke thënë se ekipi ishte “në një situatë m**-kon”, një lojë fjalësh për të treguar që gjërat ishin keq.

Megjithatë, Kasper është larguar nga posti si shef stafi dhe pritet të largohet përfundimisht nga Pentagon.

Sekretari i Mbrojtjes fajëson stafin e lartë mes përjashtimeve dhe hetimeve për rrjedhje informacioni

Sekretari i Mbrojtjes, nga ana e tij, ia hodhi fajin stafit të tij të lartë, të cilët u shoqëruan jashtë Pentagonit nga sigurimi javën e kaluar.

Colin Carroll, shef kabineti i Zëvendës Sekretarit të Mbrojtjes Stephen Feinberg, u pezullua një ditë pasi Dan Caldwell, këshilltar i lartë i Hegseth, dhe Darin Selnick, zëvendësshef kabineti në Pentagon, u vendosën në leje administrative.

Thuhej se kjo ishte pjesë e një hetimi për rrjedhje informacioni – një hetim që kishte nisur vetë Kasper.

Caldwell, në veçanti, kishte lidhje të ngushtë me Hegseth. Të dy burra të së njëjtës moshë dhe veteranë, kishin punuar bashkë në organizatën Concerned Veterans for America.

Gjatë përpjekjeve për ta mbajtur gjallë emërimin e tij në Senat, Hegseth u shoqërua nga Caldwell në Capitol Hill, në një moment kritik përballë shqetësimeve mbi sjelljen e tij.

Caldwell perceptohej si një figurë tipike “tip-A” – ambicioz dhe efikas – që e bënte punën të kryhej me vendosmëri.

“Kasper nuk i pëlqente fare që këta njerëz kishin akses të drejtpërdrejtë te sekretari,” i tha një burim Politico-s në lidhje me tre ndihmësit e lartë. “Nuk i pëlqente që ata mund të hynin dhe qëndronin në zyrë lirshëm. Donte t’i hiqte. Ishte një ‘luftë me thika’.”

Duket se edhe vetë Hegseth është kthyer kundër tyre.

Ai i akuzoi këta ish-punonjës për përpjekje për të “sabotuar” agjendën e Trump dhe pretendoi se “shteti i thellë” po punon kundër tij.

“Ata më janë sulur që ditën e parë, ashtu si i janë sulur presidentit Trump. Unë kam përjetuar vetëm një pjesë të asaj që ka përjetuar ai,” tha Hegseth për Fox and Friends. “Nuk është e vështirë të bësh këtë punë, unë e di saktësisht pse jam këtu.”

“Njerëzit që po rrjedhin informacion dhe janë shtyrë jashtë, po përpiqen të sabotojnë agjendën e presidentit dhe atë që po bëjmë,” tha Hegseth. “Është për të ardhur keq, nuk është mënyra si punoj unë, as si funksionojmë ne.”

Caldwell dha intervistën e tij të parë publike për Tucker Carlson të hënën dhe mohoi se kishte rrjedhur ndonjë informacion. Ai pretendoi se kishte folur për gjëra që byrokratët tradicionalë të Pentagonit nuk donin t’i dëgjonin.

Ai tha se hetimi ishte “armatosur” kundër tij sepse ai sfidonte idetë e rrënjosura në muret e Pentagonit.

“Unë po promovoj ide që shumë njerëz në strukturën e politikës së jashtme nuk i dëshironin,” u shpreh ai.

“Nuk justifikon atë që po ndodh me mua, por të jemi realistë – ky është realiteti i lojërave që luhen në Uashington.”

Ai gjithashtu nënkuptoi se lufta e brendshme mes stafit çoi në shkarkimin e kolegëve të tij, Selnick dhe Carroll.