Ishte vetëm festa e parë nga shumë të tjera që do të shënojnë 50-vjetorin e David Beckham muajin e ardhshëm – dhe pa dyshim e vendosi stekën lart. Familja e ish-kapitenit të Anglisë u paraqit e veshur me elegancë në një festë luksoze me kod veshjeje “black-tie”, organizuar nga miqtë e tij në Miami.

E mbajtur në restorantin ekskluziv italian Cipriani, lista e të ftuarve me 100 persona ishte e mbushur me yje të botës së sportit dhe shoubizit.

Sigurisht, asnjë festë e familjes Beckham nuk do të ishte e plotë pa fëmijët e tyre. Romeo, 22 vjeç, ishte i shoqëruar nga e dashura e tij Kim Turnbull, ndërsa Cruz, 20 vjeç, erdhi me partneren e tij Jackie Apostel. Nuk mungoi as vajza Harper, 13 vjeç.

Megjithatë, djali i madh Brooklyn dhe bashkëshortja e tij Nicola Peltz ishin mungesa e dukshme e mbrëmjes, për shkak të angazhimeve të tyre të punës në Los Angeles.

Festa – e cila u mbajt një muaj përpara ditëlindjes reale të Beckham më 2 maj – pati në mesin e të ftuarve yje të futbollit si Lionel Messi, Luis Suarez, Jordi Alba dhe Sergio Busquets, të gjithë lojtarë aktualë të skuadrës Inter Miami të David Beckham në Florida.

Legjenda e basketbollit Shaquille O’Neal, një mik i ngushtë i Davidit, festoi deri në orët e para të mëngjesit, ashtu si edhe supermodelja Cindy Crawford dhe bashkëshorti i saj Rande Gerber.

Në mesin e të pranishmëve ishin gjithashtu ylli i futbollit amerikan Tom Brady dhe regjisori Justin Theroux – ish-bashkëshorti i aktores Jennifer Aniston.

Komiku britanik Jack Whitehall u pa mes turmës, po ashtu edhe producenti televiziv Ben Winston, i njohur për punën e tij në The Late Late Show me James Corden.

Këngëtari latin Marc Anthony dhe bashkëshortja e tij, modelja Nadia Ferreira, ishin gjithashtu të pranishëm në festë.

“Festa ishte me të vërtetë e mbushur me yje,” tha një i ftuar për Daily Mail. “Por kjo është normale kur shumica e ekipit tënd të futbollit ka luajtur më parë për Barcelonën.”

Miqtë e familjes Beckham e përshkruan festën si “super argëtuese, por të qetë”.

Megjithatë, festimet vazhduan deri natën vonë dhe në një moment, David mori kontrollin e deck-eve, duke luajtur muzikë së bashku me DJ-të e njohur amerikanë D-Nice dhe Stretch Armstrong. Atmosfera ishte e mbushur me këngë të vjetra, diçka që Victoria Beckham e shijoi jashtë mase.

“Pati aq shumë nostalgji në sallë, saqë Victoria nuk mund të ngopej me të,” tha një burim për Daily Mail. “Ajo po kalonte kohën më të bukur të jetës së saj. Ishte një gëzim i vërtetë dhe pothuajse nuk u largua nga pista e vallëzimit gjatë gjithë natës.”

“Të gjitha hitet e vjetra u luajtën, duke e kthyer Davidin pas në kohë – dhe ai e dashuroi atë atmosferë.”