Franca është tronditur nga një prej rasteve më të errëta të abuzimit seksual në historinë moderne të saj. Kirurgu në pension, Joël Le Scouarnec, 74 vjeç, është dënuar këtë të mërkurë me 20 vite burg për përdhunimin dhe abuzimin seksual të qindra fëmijëve, shumica nën moshën 15 vjeç, me më të voglin vetëm 4 vjeç.

Në sallën e gjyqit të Morbihan, në Bretanjë, Le Scouarnec nuk tregoi asnjë emocion ndërsa u shpall fajtor për 111 përdhunime dhe 189 sulme seksuale, të kryera midis viteve 1989 dhe 2014. Ai ka pranuar në total 299 krime, duke përfshirë edhe dy raste të cilat ai i konsideron se çuan në vdekjen e viktimave nga mbidozimi dhe vetëvrasja.

Gjatë gjyqit, u zbuluan detaje të tmerrshme për mënyrën sesi ai abuzonte me fëmijët – kryesisht pacientë në spitale – teksa ishin nën anestezi apo sapo kishin nisur të zgjoheshin pas ndërhyrjeve kirurgjikale. Ai kishte mbajtur ditarë të detajuar me emra, moshat, adresat dhe përshkrimin e abuzimeve.

Përfaqësuesi i akuzës, prokurori Stéphane Kellenberger, e përshkroi Le Scouarnec si “djallin vetë” dhe paralajmëroi për rrezikun e lartë të përsëritjes së krimeve nëse ai do të lihej ndonjëherë i lirë. “Në SHBA, ai do të dënohej me 2.000 vjet burg,” tha prokurori.

Një avokat i viktimave e quajti atë “pedofili masiv më i keqi që ka ekzistuar ndonjëherë” dhe “bombë atomike e abuzimit seksual”.

Gjatë protestave jashtë gjykatës në Vannes, viktimat mbanin pankarta ku shkruhej “Asnjë justifikim për abuzimet” dhe “Sa të tjerë?”. Ata kërkuan ndëshkim edhe për bashkëshorten e tij, Marie-France Le Scouarnec, të cilën e akuzojnë se ka mbuluar krimet për dekada. “Ajo e dinte dhe e mbrojti burrin e saj,” deklaroi një prej zëdhënëseve të viktimave.

Kirurgu kishte qenë dënuar më parë, në vitin 2005, për zotërim të imazheve abuzive me fëmijë, por kishte marrë vetëm një dënim të pezulluar, ndërkohë që vazhdoi të punonte si mjek deri në vitin 2017, kur doli në pension. Zbulimi i plotë i krimeve të tij erdhi pas një denoncimi të një vajze 6-vjeçare fqinje, i cili çoi në zbulimin e më shumë se 300.000 imazheve abuzive dhe ditarëve kriminalë të tij.

Pavarësisht dënimit me 20 vite burg, shumë nga viktimat janë të zhgënjyera nga dënimi, duke e konsideruar të pamjaftueshëm për përmasën monstruoze të krimeve. Avokatja Francesca Satta tha se “ligji duhet të ndryshojë që raste të tilla të mos përfundojnë me ndëshkime kaq të lehta”.

Ndërkohë, autoritetet franceze kanë hapur hetime të reja për të identifikuar viktima të tjera të mundshme dhe për të hetuar sistemin shëndetësor që lejoi një pedofil të operonte mbi fëmijë për tri dekada pa u ndalur.

Një rast që nuk mund të harrohet. Një sistem që nuk mund të justifikohet. Dhe një dënim që për shumëkënd nuk është aspak i mjaftueshëm.