Fondacioni Firdeus ka marrë përsipër të mbulojë shpenzimet e kurimit të Islit, 7-vjeçarit që vuan nga leucemia dhe që humbi dy motrat e tij në aksidentin tragjik. I mituri ndodhet tashmë nën kujdesin e fondacionit dhe pritet të niset së shpejti për kurim në Itali.

Por mes dhimbjes dhe shpresës, ka shpërthyer një debat i ashpër publik. Olti Curri ka kritikuar ashpër mënyrën si u paraqit rasti në media, duke akuzuar se prindërit e shkatërruar nga humbja e dy vajzave u detyruan të dilnin para kamerave për të falënderuar “bamirësin”.

“Ah të shkretët prindër, ende pa mbledhur veten nga tragjedia që u mori dy vajzat, duhej të dilnin në publik për të falënderuar. Dhimbja i ka goditur dhe i ka thyer në mijëra copa. A nuk priste kjo punë? Apo hekuri duhej rrahur sa ishte i nxehte, sepse pas disa javësh nuk bën më lajm?” – shkruan Olti Curri.

Ky reagim ka ngjallur diskutime të forta në opinionin publik mbi etikën e prezantimit të bamirësisë dhe kufirin mes ndihmës dhe shfrytëzimit të dhimbjes njerëzore.

Debati mbetet i hapur mes atyre që e shohin fondacionin si një dritë shprese për jetën e Islit dhe atyre që e konsiderojnë ekspozimin publik të prindërve një akt cinizmi.