Beyoncé i habiti fansat e saj kur nisi të “pinë cigare” gjatë ndalesës së turneut të saj Cowboy Carter në Paris, Francë, gjatë fundjavës.

Të dielën, superylli nxori një cigare gjatë performancës dhe filloi të bëjë sikur po e tymoste në skenë – një veprim teatral, që në fakt ishte me një cigare false.

Siç shihet edhe në video të mëparshme të marra nga fansat, ajo e merr fjalë për fjalë shprehjen “e nxehtë si cigare”, duke ndezur një piano në flakë si pjesë e spektaklit.

Në një stadium plot me fansa që brohorisnin, Beyoncé doli në skenë me një veshje glamuroze: një jelek leshi me një bisht të gjatë pas saj, një bust me shkëlqim argjendi, pantallona të shkurtra shumë të ngushta me bel të lartë dhe çizme kaubojsi deri sipër gjurit.

Si në koncertet e mëparshme, ylli i muzikës e ktheu performancën në Paris në një çështje familjare, duke interpretuar me vajzën e saj të madhe, Blue Ivy. Në publik ishin edhe nëna e saj, Tina Knowles, dhe vajza tetëvjeçare Rumi Carter. Djali binjak, Sir Carter, nuk u shfaq.

Këngëtarja e “Texas Hold ‘Em” surprizoi audiencën gjatë koncertit të tretë dhe të fundit në Paris duke sjellë në skenë bashkëshortin e saj, Jay-Z, për një performancë të papritur – e para pas shtatë vitesh.

Në një video të shpërndarë online nga Cardi B, e cila ndodhej në audiencë, Beyoncé largohet për pak nga skena gjatë këngës “Crazy in Love”, ndërsa Jay-Z shfaqet papritur për të kënduar pjesën e tij.

Ata kënduan gjithashtu bashkë një version të përzier të “Drunk in Love” me “Partition”, si edhe këngën e tij “N***** in Paris”, e cila fillimisht ishte një bashkëpunim me Kanye West.

Por marrëdhëniet mes Jay-Z dhe Kanye West janë të tensionuara pas disa postimeve ofenduese të këtij të fundit ndaj Beyoncé, Jay-Z dhe fëmijëve të tyre.

Gjatë performancës, Jay-Z bëri një ndryshim të vogël në tekstin e këngës, që u interpretua si thumb ndaj Kanye-s. Në vend të “Just might let you meet Ye”, ai tha: “Just might let you meet Bey” – duke përdorur emrin e gruas së tij në vend të atij të Kanye.

Fansat e vunë re menjëherë ndryshimin, duke komentuar në rrjet: “Jay-Z e ka mbyllur me Kanye-n – e ndryshoi tekstin”; “Pas mënyrës si Kanye foli për fëmijët e tij, është e kuptueshme që s’do ta falë më”; “Kur flet për fëmijët e mi, për mua je i vdekur. Përgjithmonë.”

Në mars u raportua se Beyoncé dhe Jay-Z po mendonin të ndërmerrnin veprime ligjore ndaj Kanye West pas një postimi shqetësues ku ai përdorte fjalor vulgar për të komentuar aftësitë mendore të binjakëve Rumi dhe Sir, shtatë vjeç.

Një burim për Page Six konfirmoi se çifti po shqyrton mënyrën se si të përballen me këtë situatë, qoftë privatisht apo në rrugë ligjore. Postimi është fshirë më vonë, por Kanye pranoi se nuk e bëri për të qenë “njeri i mirë”, por nga frika se mund t’i mbyllej llogaria në Twitter.

Ndërkohë, koncerti final i Cowboy Carter në Paris përkon me lajmin se vajza e madhe e çiftit, Blue Ivy, po mendon të nisë një karrierë solo në muzikë.

Një burim tha për Daily Mail këtë javë se ajo është e interesuar të ndjekë hapat e prindërve të saj dhe disa nga kompozitorët e preferuar të Beyoncé janë duke përgatitur këngë për të. Ndihmë po merr edhe nga tezja e saj e famshme, Solange Knowles, dhe producenti i njohur The-Dream – i cili ka shkruar më parë hite si “Single Ladies” dhe “Break My Soul”.

Blue Ivy, e cilësuar nga TIME si “bebja më e famshme në botë”, ka pasur përfshirje në muzikë që në foshnjëri. Vetëm 10 ditë pas lindjes, zëri i saj dëgjohej në këngën “Glory” të babait të saj. Më vonë ajo u shfaq edhe në këngën “Blue” të nënës së saj në albumin Beyoncé.

Tani, si një adoleshente me bazë fansash të njohur si “Ivy League”, ajo duket gati për të shkëlqyer më vete.