Sa vota duhen për një mandat në Gjirokastër?

Qarku i Gjirokastrës në zgjedhjet e 2025-ës përfaqëson një nga garat më të ndjeshme në rang kombëtar. Me vetëm katër mandate për t’u ndarë dhe me një listë prej 123 mijë votuesish të regjistruar, gara bëhet edhe më e ngushtë për shkak të pjesëmarrjes së ulët të pritshme, rreth 40 për qind. Në këtë kontekst, çdo mandat kërkon afërsisht 13 mijë vota efektive, çka e kthen çdo lëvizje elektorale në një element vendimtar. Një tjetër faktor me ndikim është diaspora. Rreth 8 mijë e 300 qytetarë të Gjirokastrës që jetojnë jashtë vendit janë regjistruar për të votuar dhe, edhe nëse vetëm një pjesë e tyre aktivizohet, ndikimi në balancën e mandateve mund të jetë vendimtar. Në këtë qark, që ka njohur luhatje të vogla politike ndër vite, përfaqësimi do të varet nga aftësia për të mobilizuar baza të qëndrueshme dhe për të shmangur humbjen e votave në lista që nuk arrijnë pragun. Ndaj, Gjirokastra në këto zgjedhje mbetet një zonë e vogël, por me një peshë shumë më të madhe se numrat që përfaqëson.

Në Gjirokastër, përballja mes dy figurave që kryesojnë listat e Partisë Socialiste dhe Partisë Demokratike nuk është thjesht një garë votash – është përplasje mes dy botëkuptimeve dhe dy trajektoresh të ndryshme në politikë dhe shoqëri.

Mirela Kumbaro, ministre e Turizmit dhe Mjedisit, vjen nga një profil akademik dhe kulturor. Filologe dhe përkthyese me kontribute të njohura, ajo është bërë një nga zërat më të artikuluar të mazhorancës, duke u pozicionuar si një politikane me qasje institucionale dhe e fokusuar te zhvillimi i qëndrueshëm, promovimi i trashëgimisë kulturore dhe turizmit si motor ekonomik. E vendosur në Gjirokastër që prej zgjedhjeve të mëparshme, ajo ka punuar për ta lidhur identitetin lokal me vizionin qendror të qeverisë Rama.

Tritan Shehu, një nga figurat më të hershme dhe më të konsoliduara të Partisë Demokratike. Mjek dhe ish-ministër i Jashtëm dhe i Shëndetësisë, Shehu mbart një eksperiencë të gjatë në qeverisje dhe diplomaci. Ai përfaqëson krahun tradicional të së djathtës, me një qëndrim të fortë opozitar, të mbështetur shpesh në gjuhën e drejtpërdrejtë dhe akuzat e forta ndaj keqqeverisjes socialiste. Shehu ka qenë gjithashtu një nga zërat më të zëshëm kundër aferave të korrupsionit dhe për qartësinë ideologjike të PD-së në një kohë kur ajo vetë po përballet me sfida të brendshme.

Sa vota duhen për një mandat?

Në një qark me vetëm katër mandate ku duhen 13, 132 vota për mandat, përplasja mes Kumbaros dhe Shehut është më shumë sesa matematikë politike është një duel mes stabilitetit institucional dhe thirrjes për ndryshim, mes teknokracisë dhe përvojës klasike politike, mes një qasjeje urbane moderne dhe një diskursi më të fortë opozitar me rrënjë të thella elektorale në zonë. Fituesi nuk do të jetë thjesht partia, por edhe rrëfimi që do të bindë më shumë zemra në një qark të vogël, por me historik të madh.