Përdoruesit e Temu në Bashkimin Evropian janë në “rrezik të lartë” për t’u përballur me produkte të paligjshme gjatë blerjeve në platformë, sipas gjetjeve paraprake të një hetimi nga Komisioni Evropian. Siç raportoi më parë Financial Times, hetimi ka zbuluar lodra për foshnje, pajisje elektronike të vogla dhe produkte të tjera që konsiderohen të falsifikuara, të pasigurta ose në kundërshtim me standardet e BE-së.

Në vitin 2023, BE e klasifikoi Temu si një “Platformë Shumë të Madhe Online” sipas Aktit për Shërbimet Digjitale (DSA), çka i imponon detyrime për të monitoruar dhe parandaluar shitjen e produkteve, shërbimeve dhe përmbajtjes së paligjshme. Si një platformë VLOP, Temu duhet të ndërmarrë hapa aktivë për ta mbajtur tregun e saj të sigurt dhe në përputhje me ligjin.

BE hapi një hetim zyrtar ndaj Temu, duke shprehur shqetësime se platforma nuk po bën mjaftueshëm për të parandaluar shpërndarjen e produkteve të paligjshme ose të rrezikshme, sidomos duke marrë parasysh modelin e saj të biznesit që fokusohet në mallra me kosto të ulët. Temu tani ka mundësinë të përgjigjet ndaj gjetjeve paraprake. Nëse konfirmohet se ka shkelur rregullat e DSA-së, mund të përballet me gjoba deri në 6% të të ardhurave të saj globale vjetore.

Përveç shitjes së produkteve të paligjshme, hetimi po shqyrton gjithashtu veçori të dizajnit që krijojnë varësi, mungesën e transparencës në sistemet e rekomandimeve dhe kufizimet ndaj studiuesve për aksesin në të dhëna. Hetimi është ende në vazhdim.