Qeveria në detyrë e Kosovës është në pritje të rifillimit të plotë të bashkëpunimit me Bashkimin Evropian, pas sinjaleve për heqjen graduale të masave ndëshkuese të vendosura që prej qershorit 2023. BE ka konfirmuar për KosovaPress se po ndërmerren hapat e parë, duke rifilluar mbajtjen e takimeve të nënkomiteteve të Marrëveshjes së Stabilizim-Asociimit (MSA) dhe aktivizimin e projekteve të Kornizës Investuese për Ballkanin Perëndimor në fusha si energjia dhe infrastruktura.

Zëdhënësja e Komisionit Evropian, Anitta Hipper, theksoi se përparimi në terren, sidomos në lidhje me një “de-përshkallëzim të qëndrueshëm në veri të Kosovës”, do të kushtëzojë çdo hap të mëtejshëm drejt heqjes së plotë të masave. Ky kusht u nënvizua edhe nga Përfaqësuesja e Lartë për Politikë të Jashtme, Kaja Kallas, gjatë vizitës së saj në Prishtinë më 21 maj.

Nga ana tjetër, Klisman Kadiu, këshilltar i zv/kryeministrit në detyrë, Besnik Bislimi, u shpreh se masat ndaj Kosovës janë vendosur padrejtësisht dhe heqja e tyre duhet të ndodhë sa më parë. “Ka kaluar pothuajse një vit nga rekomandimi i Borrell për t’i hequr ato, ndaj çdo vonesë e mëtejshme është e pajustifikueshme”, deklaroi ai.

Ish-diplomatja Alma Lama tha se pavarësisht vullnetit të shumicës së vendeve anëtare të BE-së për t’i larguar masat, situata politike e brendshme në Kosovë po shihet me shqetësim në Bruksel. “BE-ja është duke ndjekur nga afër funksionimin e demokracisë në Kuvendin e Kosovës dhe ngërçi institucional mund të ndikojë negativisht,” theksoi ajo.

Parlamenti Evropian ka miratuar ndërkohë një rezolutë që kërkon heqjen e menjëhershme të masave ndëshkuese ndaj Kosovës. Megjithatë, pasojat financiare të këtyre sanksioneve kanë qenë të mëdha – me rreth 300 milionë euro dëme të raportuara për projektet e bllokuara.

Në fund të këtij muaji mbushen dy vjet nga vendosja e masave, ndërsa për Kosovën mbetet sfidë që bashkëpunimi me BE-në të kthehet në normalitet pa kushte të reja dhe me dëmshpërblim të mundshëm për humbjet e pësuara.