Lidhur me përplasjen mes Endri Shabanit dhe Adriatik Lapajt, Lëvizja “Shqipëria Bëhet” njofton se nesër, e martë, ora 11:00, kreu i kësaj force politike, Adriatik Lapaj, do të mbajë një konferencë për shtyp në ambientet e zyrës qendrore. Organizatorët kanë bërë thirrje për pjesëmarrjen e mediave dhe gazetarëve, duke premtuar përgjigje të drejtpërdrejta mbi situatën e fundit.
Në një analizë të fortë dhe të drejtëpërdrejtë të publikuar sot, një bashkëthemelues i kësaj force politike ka shpërthyer ndaj Endri Shabanit, duke e akuzuar se veprimi i tij për të kërkuar mandatin e deputetit ka qenë një akt vetëvrasës politik dhe i nxitur nga shantazhi i dyshes Rama-Berisha. Sipas tij, Shabani është futur në lojën e verës politike për të goditur pikërisht “Shqipëria Bëhet”, një forcë që po fiton terren te elektorati dhe po konsiderohet si kërcënim për partitë e vjetra.
Sipas kësaj analize, veprimi i Shabanit nuk ka asnjë përfitim për të personalisht, por dëmton rëndë të ardhmen e tij politike dhe godet unitetin brenda opozitës së re. Argumentet e tij për mandatin janë cilësuar të pabazuara dhe si justifikim për një tradhti ndaj bashkëpunëtorëve të tij të afërt. Gjesti, sipas analizës, i shërben vetëm një qëllimi: frenimit të fuqizimit të Lëvizjes “Shqipëria Bëhet” përpara zgjedhjeve të pjesshme vendore që pritet të zhvillohen në vjeshtë.
Autori shpreh bindjen se kjo lëvizje është frymëzuar dhe ushqyer nga strukturat e vjetra të pushtetit, të cilat, duke parë rënien e tyre elektorale dhe rritjen e alternativave të reja, përpiqen të ndalin me çdo mjet afirmimin e forcave të reja politike. Në fund, ai bën thirrje për mobilizim të gjerë të anëtarëve, mbështetësve dhe diasporës për të mos e lënë këtë moment historik të shpërdorohet dhe për ta kthyer “Shqipëria Bëhet” në forcën që mund të qeverisë vendin.
