Një video tronditëse e xhiruar në rajonin jugor të Dagestanit në Rusi ka shkaktuar reagime të ashpra në rrjet dhe mes aktivistëve për të drejtat e kafshëve, pasi tregon një gomar të tmerruar që detyrohet të kalojë një rrugë ajrore mbi një greminë me anë të një zipline prej mbi 100 metrash. Në pamjet, gomari është i lidhur me rrip sigurie dhe nis “udhëtimin e tmerrit” nga majat e pllajës Matlas në distriktin Khunzakhskiy, teksa dëgjohen të qeshura nga turistët e pranishëm.
Ngjarja u bë publike pasi vetë operatori turistik, i identifikuar si Ramazan, publikoi videon në rrjetet sociale me mbishkrimin cinik: “Gomari fluturoi më shpejt se shqiponja!” Megjithatë, përballë një vale të paprecedentë zemërimi, ai e fshiu videon brenda pak orësh. Brenda 24 orëve, u publikuan mbi 5 mijë komente të ashpra, duke e quajtur veprimin një akt sadizmi dhe një shembull të neveritshëm të dhunës ndaj kafshëve. “Kjo nuk është humor, kjo është torturë,” shkroi një përdorues. “Kafshët nuk janë lodra për rrjetet sociale,” shtoi një tjetër.
Sipas përshkrimit të atraksionit, “udhëtimi” zgjat rreth 40 sekonda, gjatë të cilave kafsha zbret me shpejtësi të madhe nga mali. Edhe pse nuk tregohet në video, shumë komentues dyshojnë se gomari është lënduar rëndë në ulje, ndërsa aktivistët për kafshët paralajmërojnë se ai mund të ketë pësuar dëmtime të rënda në nyje dhe shtyllën kurrizore. Operatorët e turizmit lokal, nga ana tjetër, këmbëngulin se kafsha është në gjendje të mirë dhe “nuk ka pësuar asnjë dëmtim.” Por, shqetësimi mbetet i lartë pasi gomari nuk është parë më që nga dita e ngjarjes, duke ngritur dyshime për fatin e tij të vërtetë.
Autoritetet ruse kanë konfirmuar se kanë nisur një “verifikim” të videos, e cila dyshohet të jetë xhiruar një muaj më parë, por është bërë virale vetëm së fundmi. Sipas ligjeve aktuale në Rusi, abuzimi me kafshët është i dënueshëm me gjobë deri në 2,750 paund ose burgim deri në tre vjet, nëse vërtetohet që kafsha është lënduar apo trajtuar në mënyrë mizore.
Ky incident sjell në kujtesë një tjetër rast famëkeq të vitit 2010, kur një gomar 17-vjeçar, i quajtur Anapka, u hodh me parashutë nga një plazh turistik në qytetin Anapa, i lidhur pas një varke motorike për “argëtim”. Edhe atëherë pamjet e filmimit nga pushues të tmerruar shkaktuan tronditje ndërkombëtare, ndërsa kafsha përjetoi trauma të rënda që çuan në vdekjen e saj brenda një viti, pavarësisht se më vonë u transferua në një stallë shtetërore pranë Kremlinit.
Rasti në Dagestan është një tjetër dëshmi e dhimbshme e mënyrës se si kafshët keqpërdoren për spektakël dhe klikime në epokën e rrjeteve sociale. Ndërkohë që operatorët përpiqen të minimizojnë pasojat, publiku dhe organizatat për të drejtat e kafshëve kërkojnë ndëshkim të menjëhershëm për përgjegjësit dhe ndalim të praktikave të tilla çnjerëzore.
