Aulon Kalaja ka ndarë një postim prekës në rrjete sociale pas ndarjes nga jeta të publicistit dhe analistit të njohur Artur Zheji. Ai e cilëson Zhejin si një patriot të vërtetë, ndërsa thekson se familja e tij ka dhënë një kontribut të jashtëzakonshëm për Shqipërinë.

“Ikja e tij është një humbje e madhe. I talentuar dhe me një penë të fortë, kaloi shumë sprova dhe në çdo sfidë që përjetoi, doli me sukses. Kishte mendje të hollë dhe argument të fortë. Vinte nga arti dhe historia”, shkruan Kalaja.

Ai ka zbuluar gjithashtu mesazhin e fundit që ka marrë nga Zheji: “Mos u tërhiq, vëlla!”. Kalaja shton se do ta kujtojë gjithmonë si njeriun që e mbështeti në disa kauza të rëndësishme publike, mes tyre kundërshtimi i importit të mbetjeve në Shqipëri, kundër “Minishengenit” ballkanik dhe në denoncimin e vrasjes së shqiptarëve në Greqi nga policia, ushtria dhe gardianët e burgjeve.