Arabia Saudite po përjeton një bum të paprecedentë turistik, duke u cilësuar tashmë si “Dubai i ri”, ndërsa miliona turistë po e zbulojnë për herë të parë një vend që deri në vitin 2019 ishte i mbyllur për pushuesit.
Vetëm në vitin 2024, vendi priti 30 milionë vizitorë ndërkombëtarë – dyfish krahasuar me 2022 – dhe synon të arrijë në 70 milionë deri në vitin 2030. Rritja po nxitet nga linjat ajrore të reja si Virgin Atlantic që ka nisur fluturime direkte nga Londra në Riad, si dhe nga emra luksozë të hotelerisë si Mandarin Oriental, Four Seasons, Intercontinental dhe Shangri-La që kanë hapur resorte në shkretëtirë dhe buzë Detit të Kuq.
Çfarë ofron Arabia Saudite për turistët?
Ndër atraksionet kryesore janë rrënojat antike në AlUla dhe varret e lashta të Madai Saleh, vendpushimet luksoze buzë detit që krahasohen me Maldivet, tregjet tradicionale në Xheda dhe monumentet historike në kryeqytetin Riad. Që nga 2021, vendi ka pritur gara të Formula 1 dhe duele të mëdha boksi si ajo mes Tyson Fury dhe Oleksandr Usyk.
Udhëzime praktike për udhëtarët:
- Siguria dhe veshja: Vendi konsiderohet i sigurt me nivele të ulëta krimi. Gratë këshillohen të mbulojnë trupin, veçanërisht në zona rurale. Shamitë nuk janë më të detyrueshme, por këshillohet shmangia e veshjeve të ngushta. Burrat gjithashtu duhet të vishen me modesti – pantallonat e shkurtra lejohen vetëm në pishina.
- Alkooli dhe sjellja publike: Konsumi i alkoolit është plotësisht i ndaluar, përfshirë në fluturimet me linjën kombëtare Saudia. Puthjet apo shfaqjet publike të dashurisë janë të papërshtatshme. Marrëdhëniet homoseksuale janë të paligjshme dhe mund të ndëshkohen rëndë.
- Temperaturat dhe ushqimi: Verat janë përvëluese (mbi 50°C), ndërsa janari është muaji më freskët (18-20°C). Kuzhina ofron gatime tradicionale si hummus, baba ghanoush, kabsa dhe sharwarma, si dhe pije tipike si qumështi i devesë dhe lëngu i shegës.
- Vizitat në xhami dhe pazare: Jo-myslimanët mund të vizitojnë disa xhami, por duhet të jenë të mbuluar dhe të heqin këpucët. Shmangni vizitat ditën e premte. Pazaret ofrojnë parfum me vaj trëndafili, bizhuteri ari dhe veshje elegante.
- Udhëtimi dhe viza: Fluturimet direkte nga Britania zgjasin rreth 6 orë e gjysmë. Një vizë turistike elektronike kushton 105 paund dhe përpunohet brenda 24 orësh në visa.visitsaudi.com.
Arabia Saudite po transformohet me shpejtësi nga një vend i izoluar në një prej destinacioneve më të lakmuara për aventurë, kulturë dhe luks në Lindjen e Mesme. Por pushuesit duhet të respektojnë kulturën dhe ligjet lokale për të shijuar plotësisht këtë eksperiencë unike.
