Në Samitin e NATO-s të mbajtur në Hagë, inteligjenca britanike ka ngritur alarmin për një fushatë të mirëorganizuar dhe gjithnjë e më të rrezikshme të sulmeve hibride nga Rusia, që përfshijnë ndërhyrje kibernetike dhe sabotime fizike në sektorë strategjikë të vendeve të NATO-s. Sipas një raporti të përgatitur nga shërbimet sekrete britanike dhe shpërndarë aleatëve, këto sulme po kryhen nga GRU-ja – inteligjenca ushtarake ruse – dhe synojnë sektorë kyç si transporti ajror, hekurudhor dhe detar.
Sulmet nuk janë më sporadike: sipas britanikëve, Rusia po përdor një rrjet të ndërlikuar agjentësh jo-rusë, të rekrutuar në Telegram për veprime të thjeshta por efektive si djegia e strukturave kritike apo dërgimi i pakove-bombë. Në fushën kibernetike veprojnë tre grupe kryesore: Ember Bear (për propagandë), Fancy Bear (për spiunazh) dhe Sandworm (për sulme shkatërruese), të cilat bashkëpunojnë edhe me grupe kriminale digjitale.
Fillimisht të fokusuar te zinxhiri i ndihmës ushtarake për Ukrainën, objektivat tashmë po zgjerojnë rrezikun drejt vendeve të NATO-s. Britania paralajmëron se nëse lufta nuk ndalet, do të shtohen sulmet, përfshirë edhe operacione “false flag” për të shkaktuar kaos dhe dyshime mes vendeve perëndimore. Nëse arrihet një armëpushim, Londra parashikon një valë të re spiunazhi ndaj Aleancës, sidomos në sektorët e mbrojtjes dhe energjisë.
Ekspertët britanikë theksojnë se pa një reagim të fortë dhe të koordinuar, Rusia mund të guxojë të përshkallëzojë përplasjet, deri në agresione fizike në vende më të ekspozuara. Me SHBA-në e Donald Trump që shihet si partnere hezituese, Londra bën thirrje për një front të përbashkët evropian me sanksione të reja dhe reagim të unifikuar nga NATO.
Italia është përfshirë gjithashtu në këtë luftë hibride: nga sulmet e grupit NoName57 që paralizuan aeroportet e Milanos, deri te akte misterioze si zjarri në kullën e kontrollit të Ciampinos apo vendosja e minave në një tanker në Savona. Disa raste mbeten ende pa autorë të identifikuar, duke thelluar shqetësimet për sigurinë kombëtare dhe evropiane.
