Një ngjarje e rëndë është regjistruar këtë të martë në Mamurras, ku një 38-vjeçar ka humbur jetën në vendin e punës, në një gurore ku ai ishte i punësuar.

Po riparonte një mjet pune, humb jetën në vend

Sipas njoftimit zyrtar të policisë, ngjarja ka ndodhur rreth orës 12:00, kur shtetasi P. P., 38 vjeç, banues në fshatin Sanxhak, ishte duke riparuar një mjet pune brenda territorit të gurores. Gjatë ndërhyrjes teknike, ai është aksidentuar dhe ka ndërruar jetë në mënyrë të menjëhershme si pasojë e plagëve të rënda.

Trupi në morg, policia heton për shkelje të sigurisë

Trupi i viktimës është dërguar në morgun e Kurbinit për ekzaminime të mëtejshme mjeko-ligjore. Ndërkohë, policia ka nisur hetimet për të përcaktuar nëse janë respektuar standardet e sigurisë në punë, si dhe për të identifikuar çdo përgjegjësi të mundshme nga punëdhënësi apo stafi i gurores.

Kjo ngjarje rikthen në vëmendje shqetësimet e ngritura shpesh nga sindikatat për mungesën e kushteve të duhura të sigurisë në punë në sektorin e nxjerrjes dhe përpunimit të materialeve ndërtimore.