Arlington, Washington — Pamje të publikuara nga një dashcam zbulojnë momentin kur një grua, e cila po dërgonte mesazhe gjatë ngasjes, humbi kontrollin e makinës dhe u përplas me një tabelë rrugore.
Në video, gruaja e paidentifikuar shihet duke përdorur telefonin me të dyja duart ndërsa lëviz në rrugë, përpara se automjeti të devijojë dhe të godasë një sinjalistikë rrugore. Ajo dëgjohet duke bërtitur dhe duke tentuar të rimarrë kontrollin, por më pas, pasi makina ndalon, vendos kokën në duar dhe shpërthen në ulërima.
Jose Arevalo, 18 vjeç, kishte dhënë me qira Nissan-in e tij Leaf 2013 përmes aplikacionit Turo më 25 gusht. Vetëm disa orë para se gruaja të kthente çelësat, Jose mori një mesazh prej saj, ku ajo pretendonte se “dikush e kishte nxjerrë nga rruga” dhe se makina po tërhiqej me karrotrec.
Por pas rishikimit të pamjeve nga kamera, Jose zbuloi të vërtetën.
“U shokova kur pashë videon. Besova mesazhin e saj dhe mendova se dikush e kishte shtyrë jashtë rruge. Të shihje se si po shkruante mesazhe hapur dhe më pas gënjeu në këtë mënyrë, më dukej e pabesueshme,” tha ai.
Sipas Arevalo-s, gruaja më pas i dërgoi një mesazh tjetër duke thënë se kishte paraqitur raport në Sheriff-in e Snohomish County dhe kishte hapur një kërkesë te Turo, por pa përmendur faktin që po përdorte telefonin gjatë drejtimit.
Kostot e riparimit u vlerësuan në 4,959 dollarë, më shumë se çmimi i vetë makinës, tha Jose, i cili kishte filluar të jepte makinën me qira vetëm një javë më parë për të plotësuar të ardhurat pasi orët e punës iu reduktuan.
Rast i ngjashëm në Mbretërinë e Bashkuar
Ngjarja vjen pak kohë pasi një shofer furgoni në West Sussex, MB, u dënua me burg për shkak se përplasi një makinë të ndalur ndërsa kontrollonte rrjetet sociale.
Nathan Cole, 29 vjeç, po ngiste me shpejtësi mbi kufirin e lejuar kur nuk pa një Peugeot të ndalur në korsinë anësore dhe u përplas me të, duke shkaktuar lëndime të rënda tek shoferi tjetër, i cili humbi një këmbë dhe kaloi javë të tëra në koma.
Pamjet nga dashcam treguan Cole duke shikuar vazhdimisht telefonin ndërsa ecte me 72 mph, përpara se të ndodhte përplasja. Ai u shpall fajtor për “shkaktim dëmtimi të rëndë nga drejtimi i rrezikshëm” dhe u dënua me 2 vjet e 4 muaj burg, si dhe iu hoq e drejta e drejtimit për 4 vjet e 4 muaj.
