Qëndresa Qytetare ka ngritur alarmin për një ngjarje të rëndë në Borsh të Vlorës, ku sipas organizatës, pronari i një hoteli ka kërcënuar me armë zjarri dy punonjëse, nënë e bijë. Në deklaratën publike, organizata e quan rastin “simptomë” të një sektori turizmi të kapur nga individë të kriminalizuar, pasuritë e të cilëve “nuk kanë kaluar asnjë filtër”. Ajo i bën thirrje institucioneve ligjzbatuese dhe inspektorateve të punës që të zbardhin rrethanat dhe të garantojnë mbrojtjen e viktimave.

Sipas Qëndresës Qytetare, “trajtim i punonjësve” mbetet temë tabu, ndërsa punëtorët shpesh punojnë pa sigurime, nën presion dhe dhunë. Organizata sjell në vëmendje se një vit më parë në Dhërmi u raportua vrasja me armë zjarri e një kamarieri nga pronari i lokalit, duke e lidhur eksodin e fuqisë punëtore me harbimin e pronarëve dhe mungesën e mbrojtjes shtetërore. Qëndresa Qytetare kërkon që kjo praktikë të ndalet përmes hetimeve efektive, ndëshkimeve shembullore dhe kontrollit të rreptë të punësimit e sigurimeve shoqërore në sektorin e shërbimeve.