Nga kalimi i shpejtë midis mesazheve, email-eve dhe lajmeve, te dëgjimi i podcasteve gjatë punës — shumë prej nesh praktikojnë “multitasking” pa e kuptuar. Por sipas ekspertëve të neuroshkencës, kjo sjellje nuk është produktive dhe në fakt dëmton trurin.

Neuropsikologia Nicole Byers, e cituar nga New York Times, thotë se përpiqemi të bëjmë shumë gjëra njëherësh për të shmangur mërzinë dhe për të përmbushur presionin për të qenë gjithmonë “online”. Megjithatë, truri nuk është ndërtuar për t’u përqendruar në disa detyra njëkohësisht — ai kalon thjesht me shpejtësi nga një aktivitet te tjetri. Ky kalim, sipas studiuesve nga Stanford dhe Universiteti i Kalifornisë, ul përqendrimin, rrit gabimet, lodh trurin dhe dëmton kujtesën.

Ekspertët rekomandojnë të kalojmë nga “multitasking” tek “monotasking”, duke u fokusuar në një detyrë të vetme në intervale të shkurtra kohore, dhe duke shmangur ndërprerjet. Kombinimi i detyrave të këndshme me ato më të vështira mund të ndihmojë trurin të mos lodhet, por çelësi qëndron te vetëdija për ritmin tonë dhe kufijtë mendorë.