Autoritetet ruse njoftuan të enjten se kanë kthyer trupat e 1,000 ushtarëve ukrainas të vrarë në luftime, ndërsa morën trupat e 19 ushtarëve rusë, sipas një marrëveshjeje të arritur gjatë bisedimeve të paqes të muajit të kaluar në Stamboll. Lajmin e bëri të ditur në Telegram kryenegociatori rus Vladimir Medinsky, ndërsa Ukraina konfirmoi riatdhesimin dhe falënderoi Kryqin e Kuq për ndihmën logjistike.

Pamjet e publikuara nga mediat shtetërore tregojnë qese trupash duke u transferuar me kujdes nga automjete frigoriferike, ndërkohë që burime ruse paralajmëruan se planifikohet kthimi i edhe 2,000 trupave të tjerë ukrainas. Marrëveshja mes Moskës dhe Kievit parashikon shkëmbimin e trupave të 6,000 ushtarëve për secilën palë, si dhe një shkëmbim të gjerë të të burgosurve të luftës – një nga të paktat fusha bashkëpunimi mes vendeve ndërluftuese që nga nisja e luftës në shkurt 2022. Megjithatë, armëpushimi mbetet ende jashtë arritjes.