Pagjumësia është një ndër shqetësimet më të përhapura të kohëve moderne, dhe mund të ketë një sërë arsyesh – që nga stresi i përditshëm e deri te problemet serioze shëndetësore. Mungesa e gjumit, sidomos në mënyrë të vazhdueshme, ndikon rëndë në cilësinë e jetës dhe mund të shkaktojë pasoja afatgjata për shëndetin.
Faktorët që ndikojnë në pagjumësi:
Mosha
Tek të moshuarit, ora biologjike ndryshon dhe shpesh çon në gjumë më të shkurtër dhe më të parregullt.
Stili i jetesës
Alkooli, kafeina dhe ushqimet e rënda para gjumit janë ndër shkaktarët më të zakonshëm të gjumit të trazuar. Po ashtu, mungesa e rutinës ndikon negativisht në ritmin e trupit.
Ilaçet
Medikamentet për presionin e gjakut, azmën ose depresionin mund të ndërhyjnë në ciklin normal të gjumit.
Sëmundjet kronike
Ankthi, depresioni, dhimbjet e vazhdueshme, problemet me prostatën apo sëmundje të tjera inflamatore, shpesh e bëjnë të pamundur një gjumë të qetë dhe të pandërprerë.
Si ta përmirësoni gjumin?
Krijoni një rutinë të qëndrueshme gjumi
Shtrihuni dhe zgjohuni në të njëjtën orë çdo ditë, edhe gjatë fundjavave.
Qetësoni trupin dhe mendjen para gjumit
Shmangni mendimet stresuese dhe relaksohuni me teknika të thjeshta frymëmarrjeje apo lexim të lehtë.
Hiqni dorë nga pajisjet elektronike të paktën 1 orë para gjumit
Drita blu nga telefonat dhe televizorët e ngadalëson prodhimin e melatoninës – hormonit të gjumit.
Fleni në një ambient të freskët dhe të errët
Temperatura dhe errësira ndihmojnë trupin të futet më shpejt në gjumë të thellë.
Kufizoni gjumin gjatë ditës
Edhe nëse ndiheni të lodhur, shmangni gjumin pasdite për të ruajtur balancën natyrore të gjumit.
Nëse pagjumësia zgjat më shumë se disa javë dhe ndërhyn në jetën tuaj të përditshme, është e rëndësishme të konsultoheni me mjekun për të zbuluar shkaqet e mundshme dhe për të marrë trajtim të specializuar.
