Fshatrat më piktoreskë të Britanisë janë pushtuar nga turma turistësh ditorë të fiksuar pas selfieve, duke shkaktuar kaos dhe zemërim mes banorëve. Autobusë të mëdhenj kanë bllokuar rrugët dhe parkingjet në zona si Lake District dhe Cotswolds, ndërsa vizitorët kanë mbushur trotuaret, lundrat turistike dhe hapësirat publike, sidomos gjatë pushimeve të Pashkëve.
Në Bourton-on-the-Water – i njohur si “Venecia e Cotswolds” – mijëra turistë kanë shkelur rrugicat buzë lumit, duke lënë pas koshat e mbushur me plehra dhe një atmosferë tensioni. Disa fshatra po shqyrtojnë ndalimin e autobusëve për të frenuar mbingarkesën.
Banorët e irrituar raportojnë se turistët po pozicionohen për foto para derës së shtëpive të tyre, madje duke u mbështetur mbi to. Disa kanë vendosur tabela paralajmëruese në kopshtet e tyre – madje edhe në gjuhën kineze – për të ndaluar shkeljet dhe mungesën e respektit.
Rritja e vizitorëve lidhet me promovimin e këtyre fshatrave në rrjetet sociale nga influencerë që i paraqesin si destinacione të lehta për udhëtime njëditore nga Londra. Në Bibury, një fshat me vetëm 600 banorë, mbërrijnë deri në 20,000 turistë gjatë fundjavës – një “sulm” që shumëkush e përshkruan si kthimin e fshatit në një “Disney World” pa leje.
Këshilltarja Michelle Holt nga Këshilli i Parishës së Bibury tha se situata ka arritur tashmë një pikë kritike dhe fshati nuk mund ta përballojë më këtë fluks vizitorësh.
“Volumi i vizitorëve është thjesht dërrmues për komunitetin lokal, dhe ne nuk kemi infrastrukturën e nevojshme për ta përballuar,” tha ajo.
Edhe pse Bibury ka vetëm dy stacione për autobusë pranë urës mbi lumin Coln, deri në gjashtë autobusë mbërrijnë çdo ditë. Kur vendet janë të zëna, shoferët ndalojnë në çdo hapësirë të përshtatshme – duke shkaktuar bllokime të rrugëve dhe rrezik për sigurinë.
Banorët shprehen se turistët bllokojnë trotuaret e ngushta, duke i detyruar këmbësorët të ecin në rrugë mes makinave, ndërsa autobusët që s’kanë vend të kalojnë njëri-tjetrin shkaktojnë trafik dhe tension.
“Në kulmin e sezonit turistik, mund të duhen deri në 30 minuta për të kaluar nga njëra anë e fshatit në tjetrën,” tha Craig Chapman, kryetar i Këshillit të Parishës Bibury për BBC.
Për të frenuar kaosin, autoritetet lokale po shqyrtojnë ndalimin e ndalimit dhe parkimit të autobusëve në fshat. Faza e parë e planit, që do të nisë brenda dy muajve, përfshin ndryshimin e sistemit të parkimit në qendër të fshatit, përgjatë rrugës B4425 pranë urës Swan – duke ndaluar autobusët të ndalojnë ose presin në atë zonë.
Banorët shpresojnë që kjo masë do të ndihmojë në kthimin e normalitetit në një prej fshatrave më të fotografuar të Britanisë, i cili aktualisht po mbytet nga popullariteti i tij në rrjetet sociale.
