Rreth 76% e të moshuarve mbi 65 vjeç në Shqipëri kanë nevojë për asistencë në aktivitetet e përditshme, sipas një ankete të zhvilluar nga Programi i Kombeve të Bashkuara për Zhvillim (PNUD). Të dhënat, të mbledhura nga 790 familje në fund të vitit të kaluar, i ndajnë të moshuarit në tre grupe sipas nivelit të varësisë: të pavarur (49%), pjesërisht të varur (28%) dhe shumë të varur (24%).
Siç shkruan revista “Monitor.al”, në grupin më të varur, është evidentuar një përhapje e lartë e sëmundjeve kronike: 84% vuajnë nga sëmundje kardiovaskulare, 61% nga artriti dhe 53% nga dhimbjet kronike. Këta persona vizitojnë mjekun çdo 1-2 muaj dhe shpesh marrin më shumë se pesë barna, ndërkohë që mbi 90% kanë nevojë për ndihmë në ecje, larje, ngritje nga shtrati dhe pagesa të faturave.
Përkundër këtyre nevojave, mbështetja sociale është e kufizuar. Vetëm 6% përfitojnë pagesa për paaftësi dhe 41% nuk janë të informuar për programet ekzistuese. Anketa zbulon nevojën për ndërhyrje të menjëhershme tek ky grup, përfshirë kujdes të vazhdueshëm për më të varurit dhe shërbime parandaluese për grupet me varësi të moderuar.
