Tensionet në Detin e Kinës Jugore janë përshkallëzuar sërish pasi rojet bregdetare kineze ngritën flamurin në shkëmbin e kontestuar Tiexian, pjesë e formacionit Sandy Cay, pranë ishullit Thitu që administrohet nga Filipinet. Sipas transmetuesit shtetëror kinez CCTV, oficerët kinezë zbatuan “kontrollin detar” mbi shkëmbin në mes të prillit, duke deklaruar publikisht sovranitetin e Pekinit mbi këtë territor të diskutueshëm.

Si kundërpërgjigje, një ekip i përbashkët i rojes bregdetare, marinës dhe policisë filipinase zhvilloi një mision në Sandy Cay dhe publikoi foto ku flamuri filipinas ngrihej mbi rërat e bardha të formacionit. Zyrtarët filipinas mohuan kategorikisht se Kina kishte marrë kontrollin mbi zonën, duke e cilësuar raportimin e mediave kineze si “të papërgjegjshëm” dhe duke insistuar se status quo-ja mbetet e pandryshuar.

Lojë force për sovranitet në ujërat strategjike

Përplasja e fundit ndodh në një kohë kur Filipinet dhe Kina kanë intensifikuar konfrontimet në Detin e Kinës Jugore, një zonë që Pekini pretendon pothuajse në tërësi, pavarësisht një vendimi të Gjykatës së Arbitrazhit në 2016 që i hodhi poshtë pretendimet kineze.

Ndërkohë, forcat amerikane dhe filipinase po zhvillojnë stërvitjet e përbashkëta “Balikatan”, të cilat Kina i ka cilësuar si kërcënim për stabilitetin rajonal. Anije luftarake kineze janë vërejtur pranë territorit filipinas, përfshirë pranë ishullit Babuyan. Përplasjet mes forcave detare të dy vendeve janë bërë më të shpeshta, me incidente të dhunshme si përplasja e anijeve në gusht të vitit të kaluar pranë Sabina Shoal.

Pavarësisht presioneve dhe veprimeve agresive, Filipinet kanë ripërsëritur angazhimin e tyre për të mbrojtur sovranitetin në “Detin Perëndimor Filipinas” dhe kanë denoncuar përpjekjet e Kinës për të përdorur hapësirën informative për frikësim dhe dezinformim.