Gjatë seancës së zhvilluar në Apelin e Gjykatës Kundër Korrupsionit dhe Krimit të Organizuar (GJKKO), kryetari i Bashkisë së Tiranës, Erion Veliaj, ka kërkuar lirinë, duke argumentuar se nuk ka kryer asnjë veprim të paligjshëm dhe duke krahasuar situatën e tij me deklaratat publike të ish-kryeministrit Sali Berisha ndaj SPAK-ut. Veliaj është arrestuar më 10 shkurt 2025, nën akuzat për korrupsion pasiv dhe pastrim parash.
Sipas burimeve nga prokuroria, gjatë periudhës së paraburgimit, janë regjistruar biseda telefonike midis Veliajt dhe të vëllait të tij, ku dyshohet se kanë diskutuar strategji për të organizuar fushata mediatike kundër prokurorëve të SPAK-ut. Këto përgjime janë paraqitur si prova në gjykatë, duke ngritur dyshime mbi përpjekjet e mundshme të Veliajt për të ndikuar në procesin hetimor.
Në seancë, Veliaj ka kërkuar që gjykimi të zhvillohet me dyer të hapura dhe në prani të mediave, duke deklaruar se nuk ka asgjë për të fshehur në bisedat e tij telefonike me familjarët gjatë qëndrimit në paraburgim. Ai ka theksuar se është mbajtur në izolim për një muaj, ndërsa prokuroria kërkonte prova të reja kundër tij.
Duke iu referuar sulmeve publike të Sali Berishës ndaj SPAK-ut, ku ai e ka quajtur institucionin një “organizatë kriminale”, Veliaj ka ngritur një pyetje të fortë në sallën e gjyqit: përse këto deklarata nuk janë konsideruar prova të reja nga prokuroria? Ai ka argumentuar se, ndërsa Berisha ka bërë akuza publike kundër SPAK-ut pa u ndëshkuar, ai vetë po mbahet në burg për veprime që i konsideron të pabazuara.
Megjithatë, ky krahasim nuk qëndron, pasi ekziston një dallim thelbësor mes situatës së Berishës dhe Veliajt. Berisha mund të ketë organizuar aksione politike kundër SPAK-ut, por kjo mbetet për t’u provuar, ndërkohë që nuk ka prova konkrete që ai ka ndërmarrë veprime të paligjshme. Në rastin e Veliajt, përgjimet tregojnë se ai dhe i vëllai kanë diskutuar konkretisht për të organizuar fushata mediatike kundër SPAK-ut dhe prokurorëve, një veprim i cili tashmë është provuar dhe është pjesë e dosjes së akuzës.
Ekspertët ligjorë theksojnë se ekziston një dallim i rëndësishëm midis deklaratave publike dhe veprimeve konkrete. Në rastin e Berishës, bëhet fjalë për opinione publike, ndërsa në rastin e Veliajt, prokuroria pretendon se ka prova konkrete që sugjerojnë përpjekje për të ndikuar në hetime përmes fushatave mediatike.
Seanca për shqyrtimin e masës së sigurisë për Veliajn dhe bashkëpunëtorët e tij është shtyrë për shpallje vendimi nesër në orën 10:00. Gjyqtari Engert Pëllumbi, i njohur për dënimin e ish-ministrit Saimir Tahiri, do të marrë vendimin përfundimtar lidhur me kërkesën e Veliajt për lirim kundrejt garancisë pasurore.
