Ndihma humanitare në Gaza mbërrin tepër vonë dhe tepër pak. 29 persona, mes tyre fëmijë dhe të moshuar, vdiqën nga uria në vetëm dy ditë, ndërsa 90 kamionë me ndihma qëndruan të bllokuar në pikën kufitare Kerem Shalom nga frika e plaçkitjeve.
TEL AVIV – Tragjedia në Gaza vazhdon të thellohet. Për shkak të bllokadës izraelite që prej 2 marsit dhe vonesës në shpërndarjen e ndihmave, vetëm në dy ditët e fundit janë regjistruar 29 viktima nga uria, shumica fëmijë dhe të moshuar. Ata i shtohen 56 të tjerëve që kanë humbur jetën për shkak të kequshqyerjes gjatë bllokadës 80-ditore.
Të mërkurën në mbrëmje, 90 kamionë të OKB-së hynë në Gaza dhe u drejtuan në qendër dhe në jug të Rripit. Por qëndrimi i tyre i detyruar në kufi, i ndalur nga frika e plaçkitjeve dhe pengesat e koordinimit me autoritetet izraelite, u bë fatal për dhjetëra civilë.
Në Gaza, bombardimet e vazhdueshme vijojnë të shkaktojnë viktima – 52 të vrarë vetëm dje, ndërsa evakuimet e urdhëruara nga ushtria përfshinë zona si Sheikh Zayed, Salatin, Beit Lahiya dhe Jabalia.
Sipas Gjysmëhënës së Kuqe palestineze, ndihmat janë shpërndarë vetëm pjesërisht dhe me vështirësi ekstreme. Jens Laerke nga OCHA (agjencia humanitare e OKB-së) deklaroi:
“Po përballemi me kaos, rrezik grabitjesh dhe mungesë bashkëpunimi.”
Edhe pse disa furra kanë rifilluar prodhimin e bukës falë furnizimit me miell nga WFP, situata mbetet kritike. Çmimi i bukës kishte arritur deri në 5 dollarë për një pite të vetme. Programi Botëror i Ushqimit paralajmëron:
“Pas 80 ditësh bllokadë, rreziku i urisë masive është i pranishëm. Duhet shumë më tepër ndihmë.”
UNICEF gjithashtu e ka cilësuar gjendjen si dramatike:
“Ajo që ka mbërritur është një pikë në oqean. Furnizimet nuk mjaftojnë dhe shpërndarja nuk po funksionon.”
Ndërkohë, tensionet politike janë përshkallëzuar më tej. Kryeministri izraelit Netanyahu ka vendosur tërheqjen e stafit teknik nga negociatat në Doha, duke shënuar një kolaps të radhës të përpjekjeve diplomatike. Qeveria izraelite pritet të zgjerojë ofensivën e saj me operacionin “Qerret e Gedeonit”, duke përfshirë pushtim tokësor përveç bombardimeve.
Vendimi për të ndërprerë bisedimet ka shkaktuar indinjatë edhe brenda Izraelit, ku familjarët e pengjeve e kanë quajtur “vendim që shkakton dhimbje të madhe”. Sipas një sondazhi të Israel Democracy Institute, 70 % e qytetarëve janë pro përfundimit të luftës në këmbim të lirimit të pengjeve, ndërsa vetëm 25 % mbështesin vijimin e saj deri në shkatërrimin e Hamasit.
Për herë të parë, po ndjehet edhe një rritje e ndjeshme e opozitës humanitare ndaj luftës, sidomos mes qytetarëve të qendrës së majtë.
“Ka një zgjim. Jo i gjerë, por i dukshëm,” thuhet në raportin e sondazhit./ La Repubblica
